Terceiro libro do australiano que publica Rinoceronte. O estilo deste título é marca da casa: escenas aparentemente cotiás, pero bastante excéntricas; personaxes que sempre andan sedentos ou mal de cartos e humor, moito humor. Historias curtas que nos permiten albiscar un universo literario, común a toda a obra de Cook, onde o poder da natureza aparece incólume e onde están aínda moi presentes os excesos dunha rápida e pouco escrupulosa colonización.

BIOSBARDIA

Kenneth Cook (1929-1987) foi un xornalista, documentalista e novelista australiano, coñecido polos seus relatos humorísticos, de notable éxito, que foron levados á pantalla en varias ocasións. Ademais, montou a primeira granxa de bolboretas do seu país e tamén cofundou un partido político oposto á guerra de Vietnam.

O seu recoñecemento como escritor chegou coa publicación da súa primeira novela, Wake in Fright, en 1961. A este seguiríanlle uns 20 títulos de ficción e non ficción.

Traducido por Moisés Barcia

_____